Wimbledon lejon pjesëmarrjen si neutralë të sportistëve nga Rusia dhe Bjellorusia
Wimbledon hoqi ndalimin për tenistët dhe tenistet ruse dhe bjelloruse dhe do t’i lejojë ata të luajnë si neutralë në Grand Slam-in e këtij viti, transmeton Anadolu.
“Synimi ynë aktual është të pranojmë hyrje nga lojtarë rusë dhe bjellorusë, me kusht që ata të konkurrojnë si atletë ‘neutralë’ dhe të respektojnë kushtet e duhura”, tha Wimbledon në një deklaratë.
Në vitin 2022, Wimbledon ndaloi atletët rusë dhe bjellorusë nga garat pasi Moska filloi luftën e saj kundër Ukrainës më 24 shkurt 2022.
“Ne vazhdojmë të dënojmë plotësisht pushtimin e paligjshëm të Rusisë dhe mbështetja jonë me gjithë zemër mbetet me popullin e Ukrainës”, tha Ian Hewitt, kryetar i All England Club.
“Ky ishte një vendim tepër i vështirë, jo i marrë lehtë ose pa konsideratë të madhe për ata që do të ndikohen nga lufta”, tha Hewitt.
Dy lojtarët rusë të renditur në top 10-shen për meshkuj janë Daniil Medvedev (5) dhe Andrey Rublev (7), ndërsa në mesin e femrave, bjelloruseja Aryna Sabalenka është e dyta në botë.
Medvedev, 27 vjeç, fitoi US Open 2021, një nga katër kampionatet kryesore në tenis.
Ndërkohë, 24-vjeçarja Sabalenka siguroi titullin Australian Open 2023 për t’u bërë lojtarja e parë neutrale që ka fituar një Grand Slam që kur Rusia nisi luftën e saj kundër Ukrainës.
Wimbledon 2023 është planifikuar të mbahet nga 3 deri më 16 korrik.
