Miratimi i projekt-rezolutës, Balla bisedë telefonike me Santos: Shqipëria i ka plotësuar kushte
Kryetari i Grupit Parlamentar të Partisë Socialiste, Taulant Balla, ka reaguar pas miratimit të Projekt-Rezolutës për Shqipërinë në Komisionin e Jashtëm të Parlamentit Europian.
Përmes një mesazhi në rrjetet sociale, Balla shkruan se ka zhvilluar një bisedë telefonike me Raporteren për Shqipërinë, zonjën Isabel Santos, për ta falenderuar këtë të fundit për raportin ku i kërkohet Këshillit Europian “mbajtja pa humbur kohë e Konferencës së Parë Ndër-Qeveritare me Shqipërinë”, pasi sipas KE, Shqipëria nuk ka më as kushte dhe asnjë detyrë të papërmbushur që të lidhet me Konferencën.
“Sapo falenderova përmes një telefonate Raporteren për Shqipërinë zonjën Isabel Santos, teksa Komiteti i Politikës së Jashtme i Parlamentit Europian miratoi në parim (vazhdon votimi i amendamenteve – online) Raportin e përgatitur nga eurodeputetja Santos, ku i kërkohet Këshillit Europian “mbajtja pa humbur kohë e Konferencës së Parë Ndër-Qeveritare me Shqipërinë”, duke rikonfirmuar vlerësimin shterues të Komisionit Europian se Shqipëria nuk ka më as kushte dhe asnjë detyrë të papërmbushur që të lidhet me Konferencën. Raporti do të miratohet në seancën plenare të javës së fundit të marsit“, shkruan Balla.